21.02.2023
Класная гадзіна “Маё беларускае, кроўнае, роднае”
Дзень роднай мовы асаблівы для кожнай нацыі, кожнага народа, бо няма народа без мовы, няма мовы без яго носьбіта. І беларусы не выключэнне. Нам у спадчыну засталася ўнікальная мова – жывая і мілагучная, песенная і паэтычная, старажытная і сучасная. Дзякуючы ёй можам пазнаёміцца з народнымі песнямі, казкамі, звычаямі. Дзякуючы ёй ведаем гісторыю беларускага краю з легендаў і паданняў, навуковых кніг. Дзякуючы ёй сёння можам зразумець досціп народа, мудрыя ўрокі нашчадкам, закладзеныя ў прыказках і прымаўках.
Менавіта роднай мове была прысвечана класная гадзіна “Маё беларускае, кроўнае, роднае” у 10 класе. З вялікай цікавасцю вучні расказвалі вершы, адгадвалі загадкі, гулялі ў лінгвістычнае даміно, з задавальненнем падбіралі выказванні і крылатыя выразы аб мове. Дадзенае мерапрыемства дазволіла далучыць дзяцей да духоўных скарбаў народа, абудзіць цікавасць і павагу да роднага слова, да беларускай мовы. На працягу мерапрыемства ўсім жадаючым было прапанавана прачытаць вершы або ўрыўкі з вядомых твораў беларускіх паэтаў і пісьменнікаў без падрыхтоўкі. Атрымалася вельмі цікава і займальна.